Cookie Consent by TermsFeed Majt dahkap mij - Nordland fylkeskommune

OBS! Nettleseren din er utdatert. Vi anbefaler at du laster ned en annen, moderne nettleser som Google Chrome, Firefox eller Microsoft Edge.

IMPORTANT! Your browser is out of date. We recommend that you download a more modern browser like Google Chrome, Firefox or Microsoft Edge.

Majt dahkap mij

"" - Klikk for stort bilde 

Nordlánda fylkkasuohkan barggá vijddát ja fágaj gaskan sáme ássjij mijá sebrudakåvddånime rålla milta.

To jenter i samisk kofte - Klikk for stort bilde Susanne Forsland

Åvdåsvásstádus sáme ássjij åvdås la Sebrudakåvddånime åssudagán, Dájdda- ja kultuvrraåvddånime seksjåvnån.  Ajtu la gájka fylkkasuohkana åssudagáj duogen åvddånahttet, nannit ja vuojnnusij buktet sáme gielajt, kultuvrav ja sebrudakiellemav.

Aktisasjbarggosjiehtadus Sámedikkijn

Nordlánda fylkkasuohkan ja Sámedigge li dahkam aktisasjbarggosjiehtadusáv mij guosská ájggudahkaj 2019-2022. Aktisasjbarggosjiehtadus galggá dilev láhtjet stuoves aktisasjbargguj mij guosská sámijda ja sáme guovlojda Nordlánda fylkan, ja gåktu dajt aktan vuorodit. Sjiehtadusán li sierra tjuokka ma guosski:

  • Sáme giela (Sámelága giellanjuolgadusáj tjuovvolibme, dålkkum, sáme giellaguovdátja, sáme bájkkenamá, diedo riektáj ja vælggogisvuodaj birra ma li sámegiellaj tjanádum)
  • Sáme kultuvrra ja sebrudakiellem (åhpadibme, æládus, kultuvrra, sáme máná ja nuora, kulturmujtoj háldadibme, regionálalasj plánim ja areállaháldadibme, álmmukvarresvuohta, stádapolitihkka, økonomijja)
  • Gåktu barggap aktan (sjiehtadusá, tjåhkanime, rapporterim jnv)

 

Fylka álmmukvarresvuoda guoradallam 2020

Jagen 2020 tjadádij Nordlánda fylkkasuohkan vuostasj fylka álmmukvarresvuoda guoradallamav mij dættot soapptsomav ja iellemkvalitiehtav. Guoradallama båhtusa gåvvidi gåktu ulmutjij mielas la Nordlándan årrot ja man dudálattja li ietjasa varresvuodajn, bájke åvddånahttemijn ja årrom- ja lahka birrasa fálaldagáj. Guoradallamin lij sáme duodde modula, gånnå Sáme varresvuoda dutkam båhtusijt giehtadaláj. Båhtusa vuosedi sáme álmmuk gasskamærrásattjat skåriji vuolebun gå álmmuk ietján, sierraláhkáj mij guosská badjelgæhttjamij, varresvuohtaj, iellemvuohkáj, -dilláj ja -kvalitiehttaj. Dáppe besa ienebut låhkåt guoradallama birra: Nordlánda fylka álmmukvarresvuoda guoradallam - Nordlánda fylkkasuohkan (nfk.no)

 

Sámegiela åhpadibme

Nordlánda fylkkasuohkan fállá sámegiela åhpadimev joarkkaskåvlån. Fylkkasuohkan skåvllåæjgádin vásstet ållidimes oahppij riektájt sámegiela åhpadime vuoksjuj:

 

Fylkkagirjjevuorkká

Fylkkagirjjevuorkká galggá viehkken váj girjjevuorká ájn ienebut dættodi sáme giela, girjálasjvuoda ja kultuvra gaskostimev. Fylkkagirjjevuorká la duola degu vuorodam sámegielav ienebut vuojnnusij buktet galbaj baktu girjjevuorkájn, duodden digitála sajijda gånnå sáme girjálasjvuodav vuojnnusij buktá ja gaskos. Nordlánda fylkkagirjjevuorká doajmmaplána aktijvuodan sidáj fylkkagirjjevuorkká gåvvidit sáme girjálasjvuoda ja gaskostime dilev girjjevuorkájn. Gåvvidibme la aj tjuovvolibme Nordlánda fylkkasuohkana ja Sámedikke aktisasjbarggosjiehtadusás Fylkkagirjjevuorkká gehtjadij sáme guoradallamij mij tjadáduváj jagen 2015, ja rappårtå li aj muodugattja. Gatjádallamåtsådibme sáddiduváj fylkaj álmmukgirjjevuorkájda. Dálla la rappårttå gárves, ja gávna dav dáppe: sáme gaskostibme, rappårttå 2020

 

Nordlánda sáme ásadusá

Nordlándan li moadda sáme ásadusá. Várdobaiki sáme guovdásj la Evenskjeran, valla sij dievnnu aj Nordlánda sáme álmmugav. Dåppe la dávvervuorkká, mánájgárdde, gallerijja, prosjæktadåjma ja sierraláhkáj vuorodi sáme varresvuoda gatjálvisájt.

Árran julevsáme guovdásj la Hábmerin. Árranin la kultuvrraviesso, giellaguovdásj, dávvervuorkká ja almmudahka. Siján la aj mánájåroj sierra vidnudahkan.

Stormen sáme guovdásj la Bådådjon ja dåjmat sáme giellaguovdátjav, ja duodden dilev láhtji duon dán sáme doajmmaj stádan.

Duoddara Rafe - bihtámsáme guovdátjin la kontåvrråsadje Dokmon Bájddárin. Duoddara Ráde ásat dåjmajt degu lågådallama ja kursa, ja sijá viesso Dokmon la æjvvalimsadje bájke sámijda.

Sijti Jarnge la Aarborten (Hattfjelldal). Sijti Jarnge la kultuvrraviesso, giellaguovdásj, oarjjelsáme girjálasjvuodav gaskosti ja prosjæktadåjmajt tjadádi.